如何「走佬去英國」做巴士佬 (上) – 駕駛執照篇

編輯按:本文作者為 HK Bus Channel 及 HK Car Channel 駐英國特派員

香港人呢期成日講移民,英國可以話目的地首選。但唔少人憂慮「搵食」問題,又近期英國「貨車司機荒」,相信唔少打算去或已抵達英國嘅港人考慮做職業司機。其實 「貨車司機荒」 引發連鎖效應,連巴士公司都出現人手不足。响英國揸巴士嘅收入同工作環境可算相當唔錯。呢度有得你叫「巴士台」,一定比好多人清楚。事實上,我作為過來人,而且已在倫敦生活超過二十年,由換牌到實際工作環境必定比更多人更清楚,同大家分享一吓呢個行頭嘅經驗。

喺英國,香港人臉孔巴士車長人數仍只係少數,因為多數港人從事飲食行業。至於其他亞洲裔的,中国就未見過,但有遇過來自菲律賓、越南的華人,另外仲有來自南韓的。曾經遇過一位來自香港的巴士車長,1971年入職九巴之後移居英國,繼續揸巴士,算是我遇見過資歷最深嘅車長。但已久沒碰頭,相信佢已再退休享福了。

講返駕駛執照。現時英國法例,根據維也納公約可以予香港運輸署簽發而仍然有效的駕駛執照毋需換領英國駕駛執照在英國揸車,為期十二個月,但只限私家車及電單車。即使你嘅香港車牌有「2號仔」都唔可以合法駕駛輕型貨車,即使 細架例如 VW Caddy、Peugeot Partner 之類都唔得。

Volkswagen 客貨車
僅持有香港駕駛執照不可以駕駛,必須換領英國駕駛執照才可以駕駛

如果要「揸車搵食」,即使係揸 Uber 私家車,都要去換領英國正式駕駛執照。方法係去各區郵政局索取或英國政府網站下載 D1 表格,填妥後連同 £43 申請費嘅支票或郵政本票,與及閣下嘅香港駕駛執照原件 (不是影印本) 寄回駕駛及汽車牌照局 (Driver & Vehicle Licensing Agency 簡稱DVLA) 。由於所有申請都要有非直系親屬嘅相熟朋友副簽,所以不設網上申請。

只要你到埗英國後有一個會居住逾一個月嘅地址就可以申請,因為 DVLA 審批需時最少三個星期。但要注意,DVLA 有可能隨機抽樣要求申請人提交驗身報告,咁你就要搵醫生做驗身及遞交 D4 表格,審批時間當然會較長。DVLA 批准後就會將正式簽發嘅英國駕駛執照寄到英國的府上,有效期直至閣下70大壽前一日。閣下原有嘅香港駕駛執照係唔會發還返俾你,安心做英國司機。

即使你响香港有齊4,5,6,9,10,17,18,19,20 牌都好,DVLA 都只會批出 Cat B (如果閣下嘅香港車牌係1A、2A 就是 “B auto” ),可以正式揸私家車或總重不逾3.5噸嘅客貨車,例如 平治 Vito、Vauxhall Vivaro;至於平治 Sprinter、VW Crafter、歐霸 Daily、雷諾 Master 之類嘅就要注意嗰部車嘅核准總重是否逾3.5噸,因為呢幾款車嘅「噸位」由2.5噸至6.5噸。不過都唔難辨認,「孖尾轆」必定唔得,「單尾轆」仍然要睇清楚車輛牌照資料,確定 Permitted mass 唔超過3.5噸先至好「諗」。

平治 Sprinter 「單尾轆」規格,許可總重3.5噸
Photo by Jacky Lim

另外,如果你响香港有3及22 電單車/機動三輪車牌,DVLA 就會批埋 Cat A 俾你。

相信大家接住會問「即係有齊 4,5,9,10,17 小巴、巴士牌,and/or 18,19 中、重型貨車牌甚至 20 牌『拖頭』,都唔可以立即响英國「換牌」?答案真係「唔得」。不過,亦有可遵循嘅程序去辦理。如果你打算申請英國嘅商用車駕駛執照,第一件事係準備去註冊醫務所搵醫生同你做驗身。廿幾年前我初到英國遇過嘅經驗所知嘅程序同手續,到今日都係未有變更。

申請表格亦係去郵政局取,包括 D2 及 D4,兩份都要攞齊。拎住份 D4 表格去閣下嘅家庭醫生預約做驗身,檢驗項目包括血壓、糖尿病、癲癇、視力等等,一般收費約 £100-150。完成後連埋所有填好嘅表格、車牌、費用寄返去 DVLA。審批時間約兩星期,同樣地批出後就會寄到府上。執照有效期只會到閣下45歲生日之前一日,過咗45歲續牌就要再次驗身同遞交 D4 表格。之後再每五年進行驗身,直到60歲要「年年驗身」。

英國嘅貨車分類相對於香港嘅「中、重型」係以總重7.5噸為界,3.5 – 7.5噸嘅駕駛執照類別為Cat C1,7.5噸以上嘅係 Cat C;「拖頭」係 Cat CE。

順帶一提嘅係,香港慣稱「五噸半」例如 Fuso Canter、Isuzu NPR 响英國或歐洲係用足原廠設計總重,即約7.2-7.5噸,屬 Cat C1 可駕駛車種。

在愛爾蘭的 三菱 Canter 貨車
Photo by Jacky Lim

巴士、小巴無分「私家」或「公共」,僅以座位數目同車身長度作界定 ─ 長度不逾8米且載客量不逾16座位是 Cat D1,「小巴」,超過者則是「巴士」,牌照類別為 Cat D。例如香港有見嘅 7.7米 豐田Coaster / 三菱Rosa,即使採用1+2座位佈局23座位,Cat D1 都不能駕駛。但如果拆走7張座椅就可以了。

不過,即使你成功申請到商用車駕駛執照,唔代表可以即刻去搵份揸巴士或貨車嘅工,因為你所換到嘅只屬於「臨時牌照」類別。英國同歐盟國家一樣,要求駕駛3.5噸以上貨車、載客量超過九座位嘅巴士、小巴司機,都要進行專業訓練同考核,獲取咗有效嘅 Driver Certificate of Professional Competence (簡稱 CPC) 執照,證明已完成最少 35小時有關道路安全及法例嘅訓練課程及測驗及格,先可以正式投身行業。而且之後每五年都要進行一次 CPC 課程。考取CPC 有兩個途徑,第一係自行物色私人駕駛學校,一般收費約 £ 300-400,另一個方法係去應徵做司機時由僱主安排入職訓練時一同進行。

英國 Driver Qualification Card 正面
英國 Driver Qualification Card 背面

如果你「揸搵食車」,必須隨身帶備呢張 Driver Qualification Card,如果遇上警察或DVLA「查車」而未能出示,會被罰款 £50 。

如果你本身無香港嘅巴士、小巴、中重型貨車牌,又或者未能透過 DVLA 成功換牌,亦毋需失望。其實英國有好多途徑可以學習及應考貨車、巴士駕駛執照,除咗去巴士公司、貨運公司應徵外,坊間有好多駕駛訓練學校。嗰啲學校除咗會提供學車及安排考試之外,仲有如職業介紹所為成功考牌嘅學生尋找工作,十足「包生仔」嗰隻。

預計學車及考試費約 £2000。無錯,比香港貴好X多,但要知道英國考牌嘅內容項目同用車要求唔係香港咁兒戲落伍,唔止用車係 full size 、波箱必定唔可能只得四個波,仲要考你理論,例如要明白巴士、貨車轉彎「霸兩條線」絕對唔係仆街,考你開車前「睇偈油水」、「迫力放缸」等檢查工作。亦所以唔好以為「揸大車」係好簡單。

至於工作環境、收入等方面,稍後另文再同大家分享。

備註: 所有 D1,D2,D4 表格同章程可在英國政府網站搵到,網址:https://www.gov.uk/browse/driving/driving-licences 。請勿做「伸手黨」黨員,多謝合作。

Be the first to comment

Leave a Reply

Your email address will not be published.


*