【香港電車】免費乘車安排傾掂數 揀定8月18號

之前講到因為香港奧運代表隊喺東京奧運奪得佳績，為咗與眾同賀，香港電車有打算提供免費搭車優惠畀所有乘客，然而當時有待政府當局意見…

【香港電車】免費一週賀港隊奧運佳績？ 電車公司：係有咁諗但未確實

事隔半個月，香港電車確認可以由香港電車自行「包底」提供免費搭車優惠，首先決定提供一日免費搭車優惠畀所有乘客，慶祝香港電車正式榮獲健力士世界紀錄™榮譽，躍身成為「最大的服務中的雙層電車車隊」呢一項世界紀錄認證，亦可順便同香港人同賀香港奧運代表隊喺東京奧運凱旋而歸。

香港電車表示，即使全球面對疫情拖累整體經濟，佢哋仍然期待可以喺最短時間之內同香港人一齊慶祝，所以一見到相關建議獲得當局支持，就迅速調動公司內部資源，安排喺2021年8月18號舉行香港電車第一次「自己孭飛」嘅全民免費搭車日。

香港電車認為，有賴旗下員工喺過去117年努力工作、竭誠服務，先至令香港電車正式榮獲健力士世界紀錄™榮譽，深信佢哋今後都會繼續儘力服務香港社區，令香港人會因為香港電車呢個富有歷史文化特色嘅獨特地標而引以為傲。