【港鐵東鐵綫】舊「柴頭」招標出售 港鐵公司突取消!

當東鐵綫新嘅德國西門子Trainguard MT通訊為本列車控制系統喺2021年2月6號啟用,基於年時已高,由美國易安迪(Electro-Motive Diesel)生產嘅EMD G16型(1960年代投入運作)、EMD G26CU型(1970年代投入運作)柴油內燃電傳動機車,港鐵公司未有安排佢哋過渡去新系統之下運作,全數即時退役。

港鐵公司喺2021年2月18號提出「資格預審」邀約,正式準備「出售舊柴油動力工程機車」,邀請有意競標者喺2021年3月4號下晝2點或之前,經港鐵公司電子投標系統「提交意向」。

然而,事隔3個月之後,港鐵公司2021年5月20號最後更新相關嘅招標,「出售舊柴油動力工程機車」嘅Q082835號「一般採購」招標,「批出合約」一欄被標示為「已取消」!

基於康樂及文化事務署文化博物館旗下香港鐵路博物館一直都聲稱「已經無地方再擺放新展品」,由香港鐵路博物館接收呢批舊柴油動力工程機車嘅機會係,甚至係拒絕為收留呢批舊柴油動力工程機車展開可行性研究。

今次港鐵公司取消原本會考慮任何使用舊機車作社區服務或者推廣環境保護等可行方案嘅招標,再次招標處理呢批舊柴油動力工程機車嗰陣,可能只會落得「招標接收廢舊金屬」一途!

至於最終呢批柴油內燃電傳動機車命運係點?大家有期望咩?本台都希望公眾可以關注香港可能又喪失一批文物!

Be the first to comment

Leave a Reply

Your email address will not be published.


*