【英格蘭】列車出軌撞橋 幸好無人受傷

當地時間2021年3月13號黃昏,英格蘭發生一宗列車出軌意外,現場係距離利物浦中央火車站大約12公里、位於默西塞特郡諾斯利都市自治市內嘅科比(Kirkby)火車站。

科比火車站屬於默西鐵路北綫其中一條支綫嘅終點站,事發時一列「英國鐵路507型」列車喺埋站時突然出軌,掃爛月台,並且撞上一條橫跨路軌嘅雙線行車橋。

由乘客同途人拍攝到嘅現場照片可以見到,列車車頭以及被撞嘅月台設施有明顯損毀,路軌佈滿瓦礫。

(source:Jack Morris)

當地消防隊喺當地時間1901時接報,首批兩架消防車4分鐘後趕到,並且陸續增援,更加派出專門應付災難事故嘅搜救專隊。

救援人員到場隨即展開拯救,消息指列車上當時有12名乘客,全部報稱無受傷,而且可以自行落車。至於列車車長經消防員協助下亦成功離開駕駛室,交由救護員檢查,相信亦無受傷。

(source:Andy Teebay & Liverpool ECHO)

經過大約兩個半鐘頭嘅搜索,確定無其他人被困後,當地消防隊喺當地時間大約2140時決定可以「收隊」。

默西鐵路指由於今次意外,設施搶修需時,科比火車站因此關閉,北綫列車會改以米巷(Rice Lane)火車站作臨時終點站,會安排巴士接駁去科比。

英國鐵路亦表示,暫停旗下前往科比火車站嘅列車服務,相信喺3月15號仍然無法提供服務。

涉及今次意外嘅「英國鐵路507型」列車,一抽三卡編成,首批列車由1978年開始取代二戰前生產嘅「英國鐵路502 / 503型」列車。

(與涉事列車同型號嘅「英國鐵路507型」列車,source:Donald MacRae)

隨著年事已高,默西運輸喺2016年1月決定招標建造新列車,同年12月宣佈瑞士施泰德鐵路公司以4億6000萬鎊中標。新列車代號「英國鐵路777 Metro型」,由2018年開始喺瑞士同波蘭生產,預計2021年可以全面取代「英國鐵路507型」列車。

Be the first to comment

Leave a Reply

Your email address will not be published.


*