【港鐵東鐵綫】新訊號系統啟用 舊「柴頭」正覓出路

隨著年月消逝,唔少陪伴香港人成長嘅事物都陸續汰舊換新,港鐵公司接手自九鐵公司嘅車輛亦唔例外。較早前喺2020年12月,港鐵公司已經提出「資格預審」邀約,正式準備「出售舊輕鐵第二期列車」。

而當東鐵綫新嘅德國西門子Trainguard MT通訊為本列車控制系統喺2021年2月6號啟用,基於年時已高,由美國易安迪(Electro-Motive Diesel)生產嘅EMD G16型(1960年代投入運作)、EMD G26CU型(1970年代投入運作)柴油內燃電傳動機車,港鐵公司未有安排佢哋過渡去新系統之下運作,全數即時退役。

港鐵公司喺2021年2月18號提出「資格預審」邀約,正式準備「出售舊柴油動力工程機車」,邀請有意競標者喺2021年3月4號下晝2點或之前,經港鐵公司電子投標系統「提交意向」。

根據港鐵公司公佈,今次合共需要處理4(+1)架「舊柴油動力工程機車」,正如上次有關「出售舊輕鐵第二期列車」,今次對於舊機車嘅處理方式,港鐵公司指會考慮任何使用舊機車作社區服務或者推廣環境保護嘅可行方案。

今次「資格預審」邀約,港鐵公司要求參與「資格預審」嘅申請者提供由提出申請時起計前3年嘅經核數帳目。港鐵公司提及會喺2021年3月進行「資格預審」,經揀選後,2021年4月將會向合資格申請者正式招標,預計喺2021年第2季完成整個招標到批出合約嘅程序。

中標者需要自行安排所有資源(包括及不限於人手、工具、器材、運輸),以符合香港現行《工廠及工業經營條例》、相關環保規例、以及港鐵公司內部要求嘅條件下,由羅湖編組站/何東樓車廠「攞貨」。

至於最終呢批柴油內燃電傳動機車命運係點?大家有期望咩?

Be the first to comment

Leave a Reply

Your email address will not be published.


*