【今日提提你】東鐵綫紅磡←→旺角東又停駛

因應沙中綫過海計劃中牽涉嘅拆除原有路軌、鋪設875米路軌、安裝1.3公里架空電纜工程，2021年1~10月期間（除咗3月），每個月會最少有1個指定星期日，港鐵東鐵綫來往紅磡站至旺角東站列車服務會暫停服務。

其中2021年2月就揀咗2月21號，港鐵會安排免費接駁巴士，來往九龍塘站←→紅磡站。港鐵建議乘客考慮喺九龍塘、美孚、太子呢啲車站轉車，額外車程時間短過轉坐接駁巴士，同埋唔會畀多咗車資。

如果係用單程車票嘅，喺九龍塘站記得要經指定閘機出閘喇！

不過呢~同一時間，任何喺紅磡站出閘、喺搭接駁巴士前拍咗流動讀寫器再去指定車站（紅磡／九龍塘）入閘嘅八達通卡都唔會扣除車資，有時間嘅不妨「無限次享受吓優惠」囉！

另外順帶一提，由於港鐵係容許每位乘客帶1架已拆頭轆嘅單車乘搭列車，所以如果見到有人拎住單車搭接駁巴士都係好正常嘅 (｡•ㅅ•｡)♡

嫌要轉車麻煩嘅話，不如直接轉坐其他路面公共交通工具（例如巴士、小巴）啦！