【英國巴士】巴士全身披童畫 答謝醫護抗疫症

2020年伊始，新型冠狀病毒（武漢肺炎）喺全球急速擴散，致使世界各地嘅醫護人員都疲於奔命，多國政府亦緊急頒佈旅遊禁令以至封城令。

歐洲英倫三島上嘅蘇格蘭，當局首次發佈封城令之時，當地第一巴士集團旋即同一眾教師合作，協調推出一套教育資源，務求即使返唔到學校都可以繼續教導當地兒童文藝、數理、創意、解難呢啲知識。

其中一項活動係繪畫比賽，目標係向國民保健署人員致敬，結果喺2020年11月25號揭曉，被揀中嘅作品嚟自鴨巴甸1位9歲嘅小學5年級學生阿當（Adam Foster）。

第一巴士集團拎咗服務鴨巴甸嗰一架配置Wright Eclipse Gemini車身嘅富豪B9TL型雙層巴士（車隊編號：37635，車輛登記：SV08FXS），去到鴨巴甸皇家醫院，為阿當嘅作品搞咗個簡單嘅揭幕。

第一巴士集團合共安排咗3架巴士披上阿當嘅作品作全車身塗裝，分別服務旗下鴨巴甸、格拉斯哥、福夫谷嘅分公司。

第一巴士集團表示，呢啲巴士會調去行走途經當地醫院嘅路線，以示代表公眾答謝一班默默打緊呢場抗疫戰爭嘅醫護人員，佢哋亦好榮幸得到蘇格蘭國民保健署批准，可以喺呢批向醫護人員致敬嘅巴士上畫有國民保健署嘅標記。

至於阿當，除咗有3架巴士身披佢嘅作品之外，第一巴士集團另外送咗一啲巴士公司嘅小禮物畀佢，而且仲答應佢一旦疫情緩和，當局放鬆防疫管制之後，佢可以去到集團旗下位於格拉斯哥、全英倫最大嘅巴士公司車廠參觀。

阿當表示：「無諗過自己會贏，成件事對自己嚟講好興奮，實在等唔切去睇架巴士喺市內周圍去…一定要畀學校嘅朋友仔睇。」

第一巴士蘇格蘭分部執行董事安德魯（Andrew Jarvis）就話：「我哋好鍾意唔少入圍作品，而阿當嘅作品正好為呢個城市帶嚟光明…我哋揀出阿當嘅作品就正正睇中佢可以弘揚公眾一齊感激國民保健署人員嘅精神。」

當地國民保健署發言人亦講到：「正當冬天漸近，鴨巴甸皇家醫院一眾員工都好榮幸見到阿當嘅作品。除咗睇得出公眾對國民保健署人員心存感激，亦希望可以藉此提醒公眾繼續小心防疫以保衛國民保健署人員。」