小編今日手氣好好,錯體Q巴隨手抽到

話說噚日由「浪卡」帶嚟一場無風無雨嘅8號風球(延伸閱讀:https://bit.ly/33UPgv6),令到原本喺深水埗 V Walk 商場開幕嘅「九巴 Pop Up Store」都要順延一日開始。據今朝一早經過商場嘅巴士台後勤成員講,十一點時職員先將貨品陸續上架,而現場都已經有忠實擁躉喺場外排隊守候入場購買心頭好。

九巴 V Walk 商場 Pop Up Store 會場

小編今日都有到場捧場,幫人買口罩之餘,都嚟買最新出嘅 DENNIS Dragon 冷氣巴士Q版車仔,話晒小編以前都揸過同款車型~

唔係「模型驗屍官」嘅我,本身打算行埋去貨架度,是但拎一部,四四正正無事無幹就去俾錢走人。唔知係唔係小編今日真係手氣好,埋去隨手拎一部,感覺怪怪,因為一望就見到車身裙腳噴漏咗灰色,仲以為係AD1嘅Q版車仔!放返低再隨手拎第二部,𠵱?上層唔透光嘅⋯⋯原來上層車廂內有舊垃圾喺度🤦🏻‍♂️!

小編隨手喺貨架上隨手拎三部車,三部都有問題⋯⋯🤦🏻‍♂️

唔信邪嘅小編再喺貨架上抽一部,驟眼睇好似無乜問題,但細心一睇,點解條中軸用錯驅動軸模件嘅?唔通你就係傳說中嘅 Dominator 6×4 🤣?雖然唔係「驗屍官」啫,但係都有小小要求㗎⋯⋯最後揀多兩部,一部右邊車身有好多黑點(無影相),放返低。見第五部無乜甩漏就連埋啲口罩、大富翁一齊拎去俾錢喇~

紙袋每個承惠 $5

Q版車仔嘅造功同質素,我哋唔係專家,留返俾例如「易搭製作」 (https://www.facebook.com/EasyAccessProduction/)嘅啲專業嘅去評測啦!但係講到會場安排,真係不得不讚下在場幫手嘅叔叔,當我拎住四盒口罩同其他貨品等緊俾錢時,佢主動埋嚟幫手放好啲口罩喺櫃檯面,仲好有禮貌同等解釋因為只得一部收銀機,所以請我耐心等候。雖然唔係等好耐,但叔叔咁殷勤嘅服務,真係值得嘉許!

原來其中兩部次貨,係俾人抽起咗,但又輾轉返返貨架上⋯⋯

最後,小編俾完錢離開後,喺巴士台嘅Whatsapp群組同其他後台小幫手分享呢啲「次貨」嘅相片,其中一位較早前已經去完Pop Up Store嘅後台小幫手話,原來佢都見到呢上文提及頭兩部次貨,仲特意抽咗佢出嚟交俾店員。但唔知咩原因,又輾轉回歸返上貨架上面。睇嚟九巴方面都要留意一下貨品嘅質素,如果係有人通知你哋職員貨品QC出問題,就唔好再擺返落去賣喇~

Be the first to comment

Leave a Reply

Your email address will not be published.


*