「無牌」職員揸「員接」 埔公中大外被截

根據突發事故群組消息,2020年10月23號凌晨0403時,九巴有職員發現旗下1架原本安排做「員工接送車」(行內俗稱「員接」)嘅富豪超級奧林比安12米型雙層巴士(車隊編號:3ASV492,車輛登記:KW1624)喺沙田水泉澳邨「被偷走」。

其後經翻查巴士上定位系統,發現巴士喺沙田美田路一帶,公司遂通知警方。警方新界南衝鋒隊採取行動,喺沙田美林邨發現「被偷走」嘅巴士,一直尾隨追蹤。

(九巴監察系統截圖,顯示涉事巴士0300至0500期間位置,路上紅色區域為系統偵測到超速嘅路段)

巴士其後駛上大埔公路,為逃避警車更多番逆線,到香港中文大學對開,「被偷走」嘅巴士突然扭右停車,巴士上2名男子跑入中大逃走,但雙雙被捕,其中1人報稱受傷,被送去威爾斯親王醫院。

據悉當時巴士「電牌」顯示係「員工接送車」,巴士上2人均為巴士公司職員,但駕駛巴士嘅涉事職員並無持有相關駕駛執照。

據了解,巴士曾被揸去屯門、上水、元朗、馬騮山等地區。警方指2名被捕人都係年約20歲,一同因為涉嫌「瘋狂駕駛」、「無牌駕駛」、「行車無第三者保險」、「偷車」合共4宗罪被捕。

(HK01網站截圖)

九巴回覆傳媒查詢時表示,涉事雙層巴士喺凌晨時分不翼而飛,九巴職員翻查電腦系統後揭發巴士被偷走。涉事巴士已經返回巴士廠作檢查,初步調查後相信有人以「破壞原有電路裝置」方式啟動巴士,甚至拆除限速裝置線路――據悉係有人拆去相關系統保險絲裝置。

九巴表明會嚴肅處理事件、解僱涉事員工,並重申絕不容忍同姑息任何偷竊行為,公司會配合警方調查。

Be the first to comment

Leave a Reply

Your email address will not be published.


*