九巴口罩大優惠 加送車仔好盞鬼?

由2020年新年開始,一種由(此段信息因违反相关规定,现已被屏蔽)發出嚟嘅新型冠狀病毒(武漢肺炎)喺全球擴散,引致好多人受感染,而且又有唔少人因而不幸離世。

喺2019年匆忙立法禁止市民配戴口罩嘅香港特區政府,到2020年要面對呢一場疫症嘅時候,又匆忙立法強制市民全部都要戴口罩,結果當全民去搜刮口罩嘅時候,供不應求引致公眾不安。

有見及此,作為香港其中一個最大嘅公共交通服務營辦商,九龍巴士公司決定向前行多一步,自資購入機器、設立無塵間生產口罩,提供畀市民購買。

九巴推出嘅係3層耳掛式口罩,有兩個版本分別係畀成人用同埋小朋友用,售價係每盒50個賣100蚊。

九巴聲稱佢哋生產嘅口罩係可以過濾到95%嘅細菌同埋微粒,三層物料設計有效阻隔飛沫同埋細菌,使用嘅物料唔會含有人做玻璃纖維或者合成乳膠,而生產車間更加係達到ISO 14644-1 class 8嘅標準。

呢啲口罩開賣幾個月以嚟,九巴除咗喺自己旗下嘅客戶服務中心、網上商店,以及「80M巴士專門店」之外,亦不斷喺適當嘅地方加設「口罩自助售賣機」。

去到2020年9月23號,九巴宣佈喺9月24~30號,為購買九巴口罩嘅市民提供額外優惠:

  • 買 2 盒成人版口罩送成人版口罩 1 盒
  • 買 3 盒成人版口罩送成人版口罩 1 盒 + Q版巴士 1 部(款式隨機附送)
  • 買 4 盒成人版口罩送成人版口罩 1 盒 + 大回力巴士 1 部(款式隨機附送)

2020年9月26號中午時份,本台派員去到尖沙咀天星碼頭嘅客戶服務中心,睇到九巴派職員喺現場向市民介紹今次嘅九巴口罩優惠,現場嘅口罩存貨以金屬架整齊咁排列好,部分路過嘅市民都有上前查詢。

而如果係經九巴網上商店購買,每次購買3盒或以上,仲會附送開學文具套裝(包括記事簿、文件夾、記事貼,款式隨機附送)。

1 Trackback / Pingback

  1. 九巴口罩再優惠 換新贈品抵唔抵? - 巴士台 HK Bus Channel

Leave a Reply

Your email address will not be published.


*