車長劈車發難渣? 接車被當劫車賊?

2020年8月11號朝早8點左右,警方接報紅磡海底隧道口有一架載緊客嘅116號路線「隧巴」被劫走,驚動埋工會,其後就話只係「一場誤會」。

究竟發生咗咩事呢?

首先,大家要了解一下紅磡海底隧道往港島方向嘅「劃線」,以下係由Google Map所擷取嘅影像:

康莊道南行喺去到過咗上紅磡站個出口之後,有個出口係連接去梳士巴利道,大約由嗰個位置開始就有一條「單實線」,標示唔畀左二線嘅車輛切入最左線。

大家可以見到,呢條「單實線」主要係攔住紅磡海底隧道收費廣場巴士站嘅入口。

聽落好合理喎!唔畀司機喺巴士站入口切入左線,減少阻礙巴士站入口吖嘛!

正常情況下係啱嘅…但如果話有巴士一直行左二線,咁就即係要夾硬「扭入站」?

咁提早入定最左線囉!

係囉!講就咁講,但係江湖傳聞話…不如睇相先:

(相片撮自巴士車長通訊群組)

大家覺得點?

江湖傳聞有1位九巴巴士車長,每次揸巴士去到紅磡海底隧道口,無論最左線交通情況係點,有無車阻,都係「堅持遵守地面劃線」,要「過晒嗰條『單白線』」先至切線入站。

如是者喺2020年8月11號朝早8點幾,佢揸著呢架九巴12米版本Dennis Trident Enviro500 MMC型雙層巴士(車隊編號:ATENU1000,車輛登記:UB8222)行116號路線,去到紅磡海底隧道口又係咁樣切線入站,但又頂實唔行。

江湖傳聞因此就有喺紅磡海底隧道收費廣場巴士站維持秩序嘅城巴職員叫埋咗站嘅城巴「褪車」,過程中影咗相,跟手同呢位九巴巴士車長「頂嘴」,然後呢位九巴巴士車長就話自己被騷擾,心情唔好,一於「劈車」。

在場嘅九巴區長聽到佢咁講就即刻「截鐘」,叫佢收工。

江湖傳聞話為免阻礙巴士上幾十位乘客,一位綽號「禾爺」嘅九巴區長就上咗巴士,即刻將巴士揸走繼續行程。

但係原本嗰位九巴巴士車長眼見「自己個袋都仲喺巴士未拎返」就被人揸走咗架巴士,佢身兼專營巴士僱員總工會嘅主任自然「吞唔落啖氣」,於是就報警話「巴士被人劫走」!

結果就驚動晒警察、記者、工會主席…而接手揸走架巴士嘅九巴區長將巴士按116號路線揸到鰂魚涌,再接獲警方通知將巴士揸返紅隧口「接受調查」。

江湖傳聞就係咁講喇…九巴表示「並非有人未經批准下揸走巴士」,而原本嗰位九巴巴士車長就同警察講「銀包唔見咗錢」,警察就要列做「盜竊案」開case…

誰是誰非在此不作評論,只係今次事件難免令人諗起多年前城巴…

1 Trackback / Pingback

  1. 車長劈車有前科? 同工乘客奈唔何? - 巴士台 HK Bus Channel

Leave a Reply

Your email address will not be published.


*