踎街食飯無尊嚴? 巴士相助無遲疑!

2020年對全世界嚟講將會係永誌難忘嘅一年,由年初開始,新型冠狀病毒(武漢肺炎)肆虐全球,引致多人染病,亦有唔少人因而離世。然而香港政府藉故引發民間恐慌,卻又故意胡亂實施「抗疫」政策,非但無法控制疫症傳播,更加係以此侵害香港人嘅人權、自由,乃至尊嚴。

2020年7月29號,香港政府又利用「抗疫」之名,開始實施「全面禁止所有食肆容許食客『堂食』」嘅政策 ,令到香港呢個堂堂「亞洲國際都會」嘅唔少打工仔被逼喺街頭食飯。互聯網上流傳唔少「踎街食飯」相片,令到市民深感悲憤,其中以《蘋果日報》攝影記者何家達影到有市民需要「跪地食飯」嘅情景尤其震撼…

點解香港人要跪喺度食飯 29.07.2020

Posted by 《蘋果日報》攝影記者:何家達 on Tuesday, July 28, 2020

面對麻木不仁嘅政權肆意用法令踐踏市民尊嚴,香港有唔少團體都主動提出開放場地畀市民,可以比較正常咁食一餐飯。

同一時間,長期喺街頭服務市民嘅公共巴士服務從業員,亦都飽受今次政府政策所害,不過都算係幾好彩,幾間巴士公司都主動提出點樣去處理員工「無辦法搵到合適地方坐低食飯」嘅問題。

主要提供「邨巴」一類服務嘅ABC Bus就事前一早喺辦公室擺設枱櫈,加埋間板,仲安排埋公司貓陪伴,方便佢哋嘅員工可以搵到地方落腳安心食飯。

星期三起只准外賣?我地已經準備好了#請保持清潔#每張椅只限兩個人#香港人要撐下去

Posted by ABC Bus on Monday, July 27, 2020

其他專營公共巴士服務公司亦不甘示弱,主力提供港島區專營公共巴士服務嘅新巴城巴,隨即安排每日10:00~20:00喺部份巴士總站頭放置巴士做「員工休息車」,畀佢哋嘅前線員工有一個「有瓦遮頭同埋有冷氣嘅地方」可以食飯:

新巴「員工休息車」(城巴同工亦可使用)

  • 藍灣半島
  • 嘉亨灣
  • 北角碼頭
  • 常安街
  • 港澳碼頭
  • 耀東
  • 灣仔北

城巴「員工休息車」(新巴同工亦可使用)

  • 鴨脷洲
  • 中環碼頭
  • 置富
  • 交易廣場
  • 香港站
  • 藍灣半島
  • 堅尼地城
  • 摩頓台
  • 筲箕灣
  • 華貴
  • 又一村

因應疫情以及同事用膳需要,公司會於每日10:00-20:00在以下站頭放置員工休息車,車頭會貼有「員工休息車」的字樣新巴員工休息車(城巴同事亦可使用):藍灣半島嘉亨灣北角碼頭常安街港澳碼頭耀東灣仔北城巴員工休息車(新巴同事亦可使用):鴨脷洲中環碼頭置富交易廣場香港站藍灣半島堅尼地城摩頓台筲箕灣華貴又一村

Posted by 新世界第一巴士公司職工會 on Wednesday, July 29, 2020

究竟今次安排嘅情景係點呢? 突發組嘅同事就去咗其中幾個巴士總站影咗幾張相返嚟:

(中環碼頭)
(香港站)
(交易廣場)
(藍灣半島――城巴)
(藍灣半島――新巴)

本台有訪問過部分巴士乘客,佢哋見到巴士車長需要長時間喺戶外工作,面對政府嘅政策令到巴士車長好難搵到一個地方安樂咁食餐飯,佢哋都表示同情同無奈,有部分乘客亦表示慶幸香港嘅巴士公司能夠靈活變通,同埋正式將員工當成人咁看待,唔再係盲目咁以為員工只係一件「隨時可以換走嘅零件」。

有巴士車長表示 ,巴士公司擺幾架雙層巴士喺巴士總站長期開住引擎「煲冷氣」,確實令到佢哋可以有比較好嘅地方休息同食飯,但佢哋亦提出「點解唔去試下將嗰啲充電嘅電動巴士擺落站頭?」,認為起碼可以避免持續空轉引擎,減少積聚油渣廢氣喺巴士總站入面。

至於主力服務九龍、新界地區嘅另一間專營巴士公司――九巴――亦有安排類似嘅「員工休息車」…不過暫時就本台未有人手去影相(=_=)

但係值得一提嘅係,九巴喺7月29號晚經社交媒體專頁提出咗另外一個方案,希望可以方便到一般市民解決喺街頭食飯嘅狼狽情景:

【戴咗口罩,先可以進入巴士領域!但凡事總有例外?…】九巴仔發現,原來好多人都唔知乜嘢喺巴士領域🤔!其實就係指「巴士車廂」、「巴士轉乘處」同埋「巴士總站」呢幾個地方。而家,乘客無論喺公眾場所定係巴士領域,都必須要戴口罩😷!不過總有啲頑皮乘…

Posted by KMB 九巴專頁 on Wednesday, July 29, 2020

九巴會由7月30號開始,12:00~14:30喺以下3個有蓋巴士總站劃出特別位置,擺啲櫈畀公眾可以除低口罩食飯,而且任何人都可以使用:

  • 佐敦(西九龍站)巴士總站
  • 屯門站總站
  • 大圍站總站

櫈同櫈之間會保持1.5米安全距離,如果公眾有咩問題都可以搵九巴職員協助,九巴仲會盡量安排擺風機,令「巴士總站食飯區」唔會太翳熱,希望幫到公眾可以食返一餐「安樂茶飯」。

大家都係香港人,有困難,我哋盡量互相幫忙!

2 Trackbacks / Pingbacks

  1. 街頭開飯好艱辛? 九巴動員和你lunch - 巴士台 HK Bus Channel
  2. 車長意見有接受? 電動巴士放站頭 - 巴士台 HK Bus Channel

Leave a Reply

Your email address will not be published.


*