闊別紅磡九寒暑 中環渡輪復再來

1965年6月1號,香港油麻地小輪為紅磡區嘅居民開辦咗由紅磡去中環嘅渡輪航線,2年後因「六七暴動」一度停航,至1975年九廣鐵路總站搬遷到紅磡而於同年11月30號復航,然而隨著海底隧道通車以及地下鐵路系統啟用,加上碼頭位置偏離主要住宅區,乘客數量急劇下降,原承運商喺1999年4月1號轉交天星小輪,但航線仍無起色,天星小輪由2011年4月1號開始已經停辦來往紅磡同中環嘅渡輪服務。

紅磡區居民如果需要前往港島中環一帶嘅商業中心區,除咗乘搭過海隧道巴士或者延伸到黃埔嘅地下鐵路系統之外,如果需要乘搭渡輪嘅話,最快都需要乘搭九巴8A或者8P號路線去到尖沙咀碼頭,乘搭天星小輪來往尖沙咀同埋中環嘅渡輪航線。

不過社區有呼聲認為,乘搭過海隧道巴士需要經過紅磡海底隧道,車流量過高令繁忙時間經常塞車,費時失事。而即使地鐵已經延伸到黃埔,但搭地鐵前往港島區需要轉車,繁忙時間要等幾多班車亦唔係咁容易掌握。

為咗回應香港社會對增加港內線渡輪服務嘅意見以及配合香港旅遊業發展,香港運輸署早喺2018年8月27號進行過一次「中環←→紅磡」渡輪航線招標,「流標」之後再喺2019年12月13號就「中環←→紅磡」渡輪航線以及「水上的士」渡輪服務進行捆綁招標。經公開招標之後,2020年3月23號香港運輸署宣布由富裕小輪「中標」,其後富裕小輪宣佈佢哋嘅「中環←→紅磡」渡輪航線會喺2020年6月28號正式啟航。

去到2020年6月初,富裕小輪已經喺中環八號碼頭西側嘅泊位掛起咗佢哋公司嘅標記,仲加上「中環←→紅磡線往紅磡」嘅指示牌。母公司珠江船務旗下另一間海上客運服務公司珠江客運由澳洲Austal生產,1993年建造,可載350人嘅「高明」號一度停泊喺相關中環碼頭泊位,令人以為富裕小輪會用到咁大隻雙體噴射船執行港內線渡輪服務。

謎底去到2020年6月28號正式揭盅,富裕小輪為咗隆重其事,當日朝早頭班船7點30分由紅磡開出之前,佢哋喺紅磡(南)碼頭舉行咗一個簡單嘅「中環←→紅磡航線啟航儀式」。

儀式由前有線電視新聞主播林伽遙主持,期間運輸署副署長(公共運輸事務及管理)李萃珍、珠江船務董事局主席黃烈彰、富裕小輪董事總經理曾宇分別致辭,一眾嘉賓期後仲「剪彩」同埋「切燒豬」。

(最下方相片由Commander提供)

至於講返富裕小輪呢一條新航線嘅服務,其中一樣係編定時間嘅航班表加上「開出時間」以及「剩餘座位數目」倒數系統…不過有讀者喺下晝發現,有員工可能喺更新咗資料之後唔記得隱藏返個視窗系統,導致有視窗遮蓋咗件顯示嘅資料。 (=_=)

有關碼頭設施方面, 雖然富裕小輪接手紅磡(南)碼頭嘅時間唔係好長,富裕小輪已經安裝咗新嘅閘機、新嘅指示牌、新嘅乘客候船座椅,並且喺候船區劃定咗專門畀使用輪椅嘅乘客等候嘅位置、暢通易達洗手間、育嬰室,而且仲會提供免費wifi服務。

講返喺2020年6月28號朝早嘅首航情況:早喺朝早六點幾,除咗有唔少晨運經過嘅紅磡居民去到碼頭門口了解情況甚至打卡,亦已經有市民去到碼頭排隊等候。

大約去到朝早7點25分左右,當碼頭工作人員指示乘客可以入閘上船嘅時候,久候嘅乘客都快腳咁衝入閘、衝上船,務求可以喺頭班船影相打卡留念。

首航班次最後喺朝早7點31分由紅磡(南)碼頭開出,乘搭到首航班次嘅乘客可以喺富裕小輪安排嘅禮儀小姐手上接到一張紀念膠卡。

另外,由於船上面傳媒人數眾多,為咗方便傳媒採訪首航班次,富裕小輪特別加派工作人員,成為難得容許乘客喺船尾甲板拍攝嘅特別航班(正常航班喺開航前會閂咗客艙嘅門,乘客唔能夠離開客艙去船尾甲板)。

富裕小輪用喺呢條航線上面嘅船隻,其中一艘就係首航所用嘅「富裕」號(A143023),由中國廣東省珠海市嘅江龍船艇喺2017年生產,2018年9月正式落水。

「富裕」號總長33.8米,闊8.6米,排水量170.3噸,船體由鋼製造,上蓋玻璃纖維,可載乘客199人(另計唔多於9名船員)。

動力系統配備2副746kW嘅主機以及2副60kW嘅副機,航速15節,續航力大約8個鐘頭,最大可抵受8級風同4米海浪(食水1.4米嘅船…聽住先)。

經過大約「三個字」時間嘅航程,首航班次嘅第一名落船乘客喺朝早7點46分正式踏上中環八號碼頭。

一眾紅磡往中環首航班次嘅乘客喺中環8號碼頭仲獲得珠江船務多名管理層成員列隊揮手歡送,而中環8號碼頭方面,首航返去紅磡嘅班次,乘客等候嘅人數就相形見拙,航班順利喺朝早7點50分開出。

睇返中環8號碼頭,富裕小輪都有為碼頭裝設新嘅服務中心,拴繩就一早放置喺碼頭上面,渡輪埋岸嘅時候,船員用長勾拉返上船穩住渡輪,設置栓繩嘅方法同旁邊嘅天星小輪倒轉。

珠江船務董事局主席黃烈彰接受訪問時表示,今次投得呢條航線,面對最大困難係當前疫情令公司添置器材、招聘、培訓等工作受阻,幸好能夠喺兩個幾月內做到所有準備工作。

同時接受訪問嘅富裕小輪董事總經理曾宇就話,除咗即時見到碼頭嘅改善,嚟緊佢哋會裝飾過晒個碼頭,另外會引入更環保嘅渡輪同埋為碼頭增設太陽能發電設施,而乘客亦將可以為流動通訊裝置充電。

最後再加問返究竟嚟緊呢一條航線會用乜嘢船,原來大家見到嘅「高明號」已經轉移畀咗富裕小輪,不過係編列入去可供租賃嘅船隻。

至於用返喺「中環←→紅磡航線」嘅船隻,富裕小輪董事總經理曾宇話每程一係190個客,一係130個客,咁基本上都否定咗一直盛傳「高明號」會用喺呢條航線上面嘅傳聞,亦變相確認「有記28」同「翠華203」係會用落呢條航線。

行文至此,有讀者報料話下晝好多班船都爆滿,甚至乘客需要「企位」…返工日子開始又會唔會有一班固定嘅乘客,放棄港鐵,改為支撐呢條航線呢?

Be the first to comment

Leave a Reply

Your email address will not be published.


*