本土酒廠伙電車 限量特製手工啤

話說喺2020年6月頭,身邊有啲朋友陸續掟咗啲相嚟,講起有一個怪現象――行入便利店竟然見到有啤酒係印著「香港電車」個「嘜頭」――佢哋都問:「喂,電車公司又有新生意門路?」

就著呢啲問題,當然要問返香港電車回應…(●v●)

「你哋電車公司幾時開埋釀酒廠㗎?」

『哈哈哈哈,梗係無啦!』

「但係有朋友仔喺便利店買到印著電車公司商標嘅啤酒喎!」

『其實你留意返,喺罐上面仲有釀酒公司個商標㗎…嗱,呢度先畀兩罐你試試,再安排你去釀酒廠參觀吓…到時你會明㗎喇!」

如是者喺一個好炎熱嘅6月下晝,跟著電車公司嘅引領,去到香港電車去唔到嘅黃竹坑,嚟到一間叫「少爺啤」嘅釀酒廠(話說奧妙在,聽返研究本土歷史嘅朋友講,呢區仲係用緊本土水塘水)。

嗱,無飲開酒就真係聽完啲啤酒釀造過程都係「水過鴨背」咁唔多明同唔記得㗎喇!總之一句到尾,由選材到蒸釀,眼前所見會令人感覺到佢哋係一班好有心思、好有熱誠、好想做好產品嘅後生仔女,致力釀造獨特而高質啤酒嘅香港本土啤酒廠,並且想帶起香港本土手工精釀啤酒潮流。

講返件貨,今次香港電車同少爺啤攜手合作,特別推出2款叫做「叮叮啤」嘅限量版本土精釀啤酒,暫定18,000罐。

綠罐「叮叮啤」以滿載果香、百搭易飲嘅美式淡愛爾做藍本,加入充滿夏日情懷嘅香橙、佛手柑;紅罐「叮叮啤」以清爽宜人嘅小麥啤做基底,特別加入昔日情懷中式材料――生薑、桂花。

至於罐身包裝,設計靈感源自英國電車愛好者Mr. Bob Appleton、香港電車支持者Mr. A.Stevenson、香港本地著名收藏家張順光先生提供嘅珍貴歷史照片。

綠罐上嘅係1960年代香港電車車款配上代表電車車身的經典綠色,紅罐上展現返第一代同埋第二代香港電車,融入趣緻手繪設計,務求刻畫返香港形象。

問返「究竟今次合作理念係乜?」,電車公司嘅代表都好簡單直接咁答「自1904年,香港電車見證著唔同年代嘅『香港製造』,承載屬於每一代香港人嘅美好回憶,雖然香港電車依家由一間法國公司持有,但仍然致力希望可以用返香港電車一貫『最代表到香港』嘅形象,自我革新之下帶動埋其他香港本土牌子,共同貢獻社會。」

無飲開酒就無謂評酒,於是問吓有介紹過手工啤李文意(My叔)點睇。

佢好簡單咁話,紅罐比較清新,適合夏天飲,至於綠罐就味道比較強烈,佢個人更加鍾意。佢話不如大家都幫襯買嚟飲吓,咁樣先至「真正知味道」。

今次「電車公司出啤酒」當然唔少得喺電車賣廣告啦!香港電車安排咗#76電車,身披全車身廣告宣傳,大家不妨影低佢啦!

臨尾老土啲都要講返句:酒呢~揸車前咪飲!

Be the first to comment

Leave a Reply

Your email address will not be published.


*