本土藝術與手作 電車帶你同欣賞

香港電車自1904年開始服務香港市民,多年嚟除咗連接港島北岸東西兩端之外,更加已經成為咗香港喺世界上獨有嘅標記。

香港電車有限公司近年銳意革新形像,其中一樣行動就係加強推廣香港本地創作同文化。

2020年初,設計香港地 – #ddHK連同香港動漫畫聯會香港動漫海濱樂園就搵咗香港電車,喺灣仔推出地方營造作品,為公眾帶嚟驚喜之餘,亦為公共空間注入活力。

其中一組作品「#dd推介──漫漫遊」以香港動漫經典角色為創作藍本,包括2個動「漫」電車站同埋2架動「漫」電車,為公眾帶嚟充滿地道文化特色嘅「動漫遊樂場」旅程。

去到2020年4月,專門從事藝術展覽、藝術相關項目同埋光影藝術裝置嘅CeeKayEllo藝術設計工作室亦搵到香港電車合作, 舉辦一項名為「Classic Craft, Modern Meaning」嘅非牟利本土手工藝術品活動。

呢次佢哋就搵到香港電車嘅61號電車作為流動藝術品展覽場地,展覽會有雀籠師傅陳樂財先生以及麻雀雕刻師傅張順景先生連同香港本地手作家Amanda TONG、GoHung,以及國際藝術家Frederic BUSSIERE、松村 淳,一齊探索同埋創造四幅迎合現代社會行為嘅藝術作品,希望可以為年輕一代對傳統手工藝提出新嘅觀點與角度。

藝術應該係屬於任何人,無分時間、地點都能夠擁有嘅一樣嘢,所以呢啲決定用電車展出藝術作品就能夠突破以往個人或者團體參觀嘅限制。

電車上面擺放一啲能夠實際被乘客接觸到嘅藝術品,令乘客喺車程入面有時間可以發掘出藝術品有另一面欣賞價值。

隨著社會趨向工業化同現代化,無數依賴本土傳統手工藝嘅行業都慢慢被現代社會淘汰。展覽希望能夠繼續發掘唔同嘅角度,為本地手作業注入現代工藝新動力,並且希望可以從中令正在沒落嘅本土手作藝術工藝能夠繼續維持發展落去。

CeeKayEllo策劃放喺61號電車入面嘅展覽,由2020年4月17號開始,原定去到6月10號終結,不過已經延長到6月23號,朝十晚八咁喺電車軌上面同大家相遇。

或許有人會問:點解一啲本土手作、藝術嘅活動會揀香港電車作為合作夥伴、喺電車嘅車箱入面作出展覽呢?

其實答案好簡單:因為香港電車每一架車輛都係由香港人、喺香港地方、以本土工藝模式生產出嚟!

香港人係咪應該致力去支持同埋保育香港呢一啲傳統文化技能呢?

Be the first to comment

Leave a Reply

Your email address will not be published.


*