腕纏手帶搭巴士 乘客恐懼會出事

話說2020年3月22號中午左右,九巴一架行緊269D號路線、去緊瀝源方向嘅12米版E500型雙層巴士(車隊編號:ATENU1345,車輛登記:VH6415),喺城隧轉車站要停止服務,乘客要「過車」。

根據網絡社交媒體流傳嘅資訊,事件起因係有乘客發現巴士上有腕纏衛生署發出畀因應新型冠狀病毒(武漢肺炎)疫情而需要「隔離」者嘅手帶。

巴士上曾經有乘客致電相關政府部門以及警方,均未獲有效協助,結果要由巴士車長喺城隧轉車站「響台」,乘客亦要「過車」。

警方發言人回應傳媒查詢時講到,1226時接到1名巴士司機報案,指喺荃灣城門隧道巴士轉乘處發現有乘客懷疑佩戴緊監察手帶搭巴士。之後警員到場了解,得悉嗰名33歲非華裔女子較早前搭飛機抵達香港,經測試對新型冠狀病毒呈陰性,於是坐私家車離開機場,再轉搭巴士由元朗到沙田進行家居隔離,警方已經聯絡相關部門跟進。

九巴發言人證實喺大約1220時,1架由天水圍開去沙田嘅269D號路線巴士行到城門隧道轉車站嗰陣,有乘客向車長指巴士上有1名外籍乘客戴上檢疫用電子手環,車長報警求助。九巴職員安排乘客喺嗰個巴士站轉搭另一架巴士。而涉事巴士已按程序暫停服務,即刻揸返巴士廠進行「大洗」消毒。

本台喺呢度呼籲,任何需要接受「隔離」嘅人士,切勿擅自違反衛生署授權人員所發出嘅指示,以免觸犯法例之餘,引起公眾不必要嘅恐慌。

Be the first to comment

Leave a Reply

Your email address will not be published.


*