【美國巴士】頒令居家避疫情 灣區纜車變巴士

隨著新型冠狀病毒（武漢肺炎）疫情急速擴散，美國加州三藩市公共衛生部要求轄區內所有非必要業務及商戶全體暫停營業，直至2020年4月7號，並且喺必要時會延長措施。

由「市場街鐵路組織」營運、位於三藩市渡輪大廈嘅三藩市鐵路博物館，亦響應當局要求，暫停接待遊客。然而，如果遊客經佢哋嘅網站購買紀念品，佢哋仍然會儘力交貨，不過希望買家唔好介意會耗時較平時耐。

另一方面，美國加州三藩市當局喺當地時間2020年3月16號頒令，灣區內6個縣嘅居民「就地避難」，當局指除咗睇醫生、購買藥物等必須物資外，居民應該「留返喺屋企」，而如果必須外出，亦應該同其他人保持6呎距離。（編輯補充：美國當局嘅其中一個準則係當發覺環境中有核、生、化等危害物質存在――不論係意外洩漏定係人為發放――就會因應情況發出「就地避難」指令。按照美國紅十字會指引，「就地避難」係指居民應該留喺當時身處嘅室內地方、搵一處較少窗門嘅房間暫避――今次大家可以當係三藩市版嘅「集體居家隔離令」。）

「市場街鐵路組織」因應當局呢個指令，已經即時調整公共交通服務。

其中由於車廂並無合適間隔分開乘客同車長，「市場街鐵路組織」停止三藩市內嘅纜車服務。不過，由於應急服務人員仲係要返工放工，同埋居民總會有需要出門補充物資，「市場街鐵路組織」會安排巴士行走原有纜車線部份路段，為當地居民提供必須嘅公共交通服務。

「市場街鐵路組織」管理層表示，呢個臨時安排必定會優先考慮員工安全，並對喺呢個艱難時間仍然肯返工服務居民嘅一眾公共交通業職工致敬。