城、新措施有更新 車長報到量體溫

為咗預防新型冠狀病毒(武漢肺炎)傳播,城巴、新巴已經要求營運部前線員工每日返工之前,喺屋企自行量度體溫。

而由2020年3月23號開始,城巴、新巴會喺下圖表列主要巴士車長簽到地點實施體溫檢查,以便公司加強監察。

巴士車長簽到前,需要佩戴好口罩,去到簽到地點嘅指定區域,由站長、車務督察或得到授權嘅車長用紅外線探熱器量體溫。

當日未曾量度體溫嘅巴士車長,將唔可以入去站長室、休息室、派更部、控制中心。

如果探熱器顯示黃色或紅色,代表員工有發燒,車長需要等5分鐘,再重新量度體溫。若然第2次量度體溫嘅時候,探熱器仍然顯示黃色或紅色,就必須即時上報控制中心,清楚列明體溫度數做記錄,有關車長當日唔可以返工,並且要立即求醫,相關診斷結果要盡快向公司報告。

公司提醒各站長,每日完成簽到後必須檢查探熱器電量,若有需要換電芯就通知控制中心。到站長交更時要當面確認交收探熱器,夜晚收工嗰陣要將探熱器收入夾萬鎖好。

由於紅外線探熱器係敏感電子裝置,公司指示要妥為使用,千祈唔好接觸到被量度體溫者嘅皮膚,唔好亂咁擺放,更加唔好拎嚟掟。

呢個措施遲啲會推展去其他有站長當值嘅站頭同埋簽到地點,屆時所有下列外勤員工都必須喺簽到前量度體溫:

  • 車長
  • 站長
  • 督察
  • 站務助理
  • 乘客服務員
  • 行李服務員
  • 外僱清潔員工

1 Trackback / Pingback

  1. 網傳「手帶車長」照 初步消息指偽造 - 巴士台 HK Bus Channel

Leave a Reply

Your email address will not be published.


*