城巴啟德開新線 加強屯馬線連接

2020年2月14號情人節,港鐵屯馬線一期正式通車,馬鞍山線去到大圍站之後,會經顯徑站同鑽石山站擴展部份,駁到去啟德站。

就喺同一日,城巴喺原有22號路線(啟德郵輪碼頭←→九龍塘(又一城))基礎上,加開全日短程班次22M號路線(啟德郵輪碼頭←→九龍城)。

城巴22M號路線以循環線方式運作,折返點係九龍城迴旋處(世運花園),大致就係跟22號路線喺啟德郵輪碼頭同埋富豪東方酒店之間嘅走線,不過就喺麗晶花園13座同埋沐虹街之間,兜埋入德朗邨同埋啟德站。

不過有樣嘢值得留意:城巴22M號路線喺德朗邨同埋啟德站之間嘅3個巴士站屬於兩個行車方向都會停同一個站位,只係分開種咗兩條站柱畀乘客識別――大家遞手截巴士時要小心唔好上錯方向喇!

叉開少少咁順便講埋,新蒲崗譽.港灣基座嘅商場Mikiki喺近年逢星期六、星期日、公眾假期都安排咗穿梭巴士來回商場同埋沐安街(即係城巴20號路線原定安排嘅總站),好似係消費滿40蚊就可以換一張穿梭巴士乘車券,而穿梭巴士單程大約10分鐘。

商場趁著屯馬線一期通車、啟德站啟用,派咗兩位少女去到啟德站派發免費穿梭巴士乘車券,宣傳商場呢個服務。

(頂圖右邊嗰個係商場請嚟嘅攝影師,大家切勿恐慌!)

但…其實…隨著啟德站啟用,周圍多咗啲臨時行人通道,識行嘅話,由啟德站B出口行過去,應該仲快過坐穿梭巴士。(●_●)

【步行5分鐘直達 輕鬆暢遊Mikiki 】Weekend想岀門輕鬆一下?🤗一於嚟Mikiki 享受一個輕鬆weekend!屯馬線今日終於正式開通啦🚇由啟德站B岀口往沐元街方向,步行至Mikiki只需5分鐘🚶🏻‍♂🚶🏻‍♀🚶🏻‍♂大家可以多個選擇,隨時嚟到Mikiki行街、Shopping、食嘢啦😋#啟德站 #B岀口 #5分鐘直達 #shopping #mikiki

Posted by Mikiki on Friday, February 14, 2020

究竟啟德站啟用之後會點樣影響到周圍嘅公共巴士服務生態?大家拭目以待喇!

Be the first to comment

Leave a Reply

Your email address will not be published.


*