【澳門巴士】肺炎引致客量減 七線巴士轉細車

因應新型冠狀病毒(武漢肺炎)疫情持續,防疫工作已經到咗關鍵時刻,澳門政府再次強調,居民應該留喺屋企,如非必要,唔應該外出。

伴隨相關防疫建議,澳門市面乘搭公共交通嘅人數銳減,澳門交通事務局連同兩間巴士公司經多日觀察客流情況後協調,由2月10號開始,陸續將7條路線嘅巴士轉為較細車型,直至另行通知,當中包括新福利嘅 4、9A、39、72 號線路;澳巴嘅 50B、71、MT2 號路線。

喺呢段期間,如果呢啲巴士路線用返原本巴士車型,相關財政援助仍會以較細車型計算,從而合理利用公共資源,並平衡出行同埋公共衛生嘅需要。

澳門交通事務局呼籲乘客留意並理解上述安排。

澳巴董事總經理梁美玲接受澳門廣播電視訪問時表示,經過商討之後,澳巴將繼續使用路線原有相同車型(大或中車型)行駛相關路線,令車廂內人與人之間保持一定距離,以保障車長同乘客安全、降低風險,但只會按中或細車型服務向澳門政府收取財政援助。

梁美玲又提到,目前澳巴已減少超過 5 成班次,客流量減少近 7 成,每日維持約 3000 班次。

7條巴士路線轉小車型行駛 澳巴:履行社會責任 維持用原車型行駛

【當局要求兩巴7條路線改小巴】#即使以原車型行駛都只以小車型計財政援助【車細咗 空間少咗 傳播風險咪大咗?】澳巴:為了降低車廂客流聚集提升空間環境衛生決定維持用原車型行駛履行社會責任新福利:會轉用較小車行駛,但隨後刪除相關通告今早仍然以原車型行駛這次調整牽涉的巴士路線包括4、9A、39、50B、71、72、MT2

Posted by TDM 澳廣視新聞 on Sunday, February 9, 2020

新福利副總經理李啟見其後回應澳門廣播電視時表示,新福利暫時將 9A、72 號路線嘅巴士車型由大巴轉為中巴,另外 4、39 號路線就會視乎客流量變化再作調整。

李啟見解釋,每一班巴士班次計,目前 9A 號路線平均有 27 人乘搭,72 號路線只有 12 人乘搭,喺善用資源嘅前提下,新福利經評估後作出有關調整。

李啟見又提到,自2月9號開始已經為車長安排轉換車型嘅駕駛培訓,以保障市民出行安全

澳門電台就今次轉換巴士車型訪問巴士乘客,有巴士乘客認為改用較細型號巴士會增加傳播病毒風險,未來會考慮改搭其他巴士路線;亦有巴士乘客認為唔影響正常出街,因為喺繁忙時間,要搭巴士係大細車型一樣多人到無位坐,傳播風險一樣。

Be the first to comment

Leave a Reply

Your email address will not be published.


*