古董「珍寶」跑大山? 試路之後仲在生!

話說,現時保育緊一架利蘭「珍寶」而又有車輛登記可以出吓街嘅「香港珍寶巴士」,嚟緊喺2020年1月18號會搞「牛河」,仲話會上大帽山添!

*** 報咗名嘅朋友,小編會陸續回覆確認畀大家,請大家耐心等候,到目前為止已經額滿,多謝各位支持***[珍寶面世60載~大帽山之旅遊覽活動詳情(18/01/2020)]今年2020年是Daimler…

Posted by Jumbo bus Hong Kong on Wednesday, 8 January 2020

呢一架前中巴利蘭「珍寶」SF15(原車輛登記CD1446,曾服役於新巴,並被改裝成「員工溝通巴士」SV60,經保育後改以WD3519重新出牌),佢喺香港做嘅首次車輛登記係1980年2月4號,計落到2020年佢已經係40歲…公佈咗今次活動消息之後,第一時間不禁令人提出疑問:「喂~佢咁老仲走去跑大山?」…有外國嘅巴士保育同好聞訊後甚至高呼:「Please don’t torture the elderly!」(=_=)

當然,搞得咁「high」嘅「牛河」活動,事前又點會無做吓實地測試呢?喺呢度就講吓較早前跟過嘅其中一次實地測試…不過首先…(⊙_⊙)”

喂喂~係咪999?呢度有堵路呀!佢全身黑色…仲「牛咁眼」望住我!

嗱,荃錦公路大帽山呢一段真係郊野地方嚟,有山、有樹、有動物係好正常,大家放鬆啲,唔好挑釁啲動物就基本上唔會出事嘅!(^_^)y

至於去得荃錦公路搞「牛河」,自然唔少得拜訪「大帽山郊野公園」巴士站,根據「香港巴士大典」所講,呢個巴士站係全香港海拔最高嘅巴士站,仲高過昂坪㗎!

當日揸巴士嘅師兄仲喺現場測試埋「掉頭」,雖然因為馬路兩邊嘅高低有啲分別,被行人路刮到「珍寶」老爺右邊個下巴,但係無受傷嘅。而當時喺巴士站等緊九巴51號路線巴士嘅乘客都對巴士可以咁「掉頭」嘖嘖稱奇!

去得「郊遊」,梗係唔少得「港女式打卡」,搵返個郊野公園牌合照先!

嫌「大欖郊野公園」太濕碎?去影埋「大帽山郊野公園」個牌又點話…(●v●)

如果要講到行程最癡線一幕,應該係上埋去大帽山扶輪營地側邊個停車場,聽當日揸巴士嘅師兄講,「應該之前都無雙層巴士上過咁高」。

順帶一提,停車場側邊嘅大帽山茶水亭,由「蓮姐」經營咗廿幾年,近日有傳政府當局又要重新招標,究竟呢個大帽山代表人物仲可唔可以繼續開檔?大家不妨留意吓、幫襯吓。

「珍寶」老爺嗰日上完大帽山之後,仲係身體精神,所以帶佢去「餵食」埋先至散水…聽聞佢返到屋企都無「扭計」。

報咗名、畀咗錢參加2020年1月18號個「牛河」嘅朋友仔,嗰日好天嘅話,大家應該都可以開心玩幾個鐘頭啦!

Be the first to comment

Leave a Reply

Your email address will not be published.


*