是咁的，2019年10月嘅時候巴士台曾經收到有讀者提供影片，發現一個疑似九巴嘅車廂有曱甴出沒。
當時都有講過，縱然香港各間巴士公司向來都有安排承辦商為巴士進行清潔同埋滅蟲…不過，如果乘客無視公德，喺巴士上飲食又跌到周圍係、喺巴士上有垃圾就隨手丟隨手揳，整到個環境污糟晒，又點會無曱甴吖！
至於喺2019年3月，九巴官方Facebook專頁曾經講過：「清潔又點？都無公德心嘅」――當時仲曾經引起一件討論熱潮。而去到2019年12月又有另一個官方Facebook專頁再次講起呢種情況…
今次提起有關巴士車廂清潔嘅係香港食物環境衛生署有關清潔香港運動嘅清潔龍阿德，佢希望大家乘搭公共交通工具嘅時候都記得要保持清潔，同埋唔好留低任何垃圾，留返個乾淨嘅車廂俾下一位乘客。
無獨有偶嘅係清潔龍阿德呢個宣傳畫入面選擇嘅係巴士，而根據配色睇落應該又係疑似九巴喎！
不過…叫乘客唔好留低啲垃圾，經常都聽到咁回應：
「如果無人掉垃圾，清潔工人邊有嘢做呀？」
「我哋唔亂拋垃圾嘅話，啲清潔工人就無工開㗎喇！」
香港地始終有一部份人抱有呢種心態。
其實無論乘搭任何公共交通工具，甚至乎係不論身處任何地方，保持清潔都應該係一個人應有嘅義務。
1 Trackback / Pingback