【新加坡】地鐵壞訊號系統 轉巴士人頭湧湧

新加坡地鐵系統南北綫2019年12月16號朝早返工繁忙時間出現訊號故障，武吉甘柏同克蘭芝兩個地鐵站之間地鐵服務一度停頓。

根據新加坡ChannelNewsAsia所講，有乘客大約喺朝早8點發現地鐵列車無法提供服務，而SMRT去到0815時經Twitter發佈消息，證實南北綫服務受阻。

部份列車要喺鐵路中段滯留，有乘客被困喺地鐵車廂超過半句鐘。

亦有乘客表示喺受阻嘅地鐵車站入面等咗6班車都無辦法上到地鐵，而地鐵站入面無相關廣播，乘客對於呢個混亂情況茫無頭緒，應該繼續等車定離開車站都揸唔到決定――地鐵站職員要大約事發後25分鐘先至到場向乘客表示列車無法提供服務。

SMRT一度安排免費接駁巴士接載乘客來往裕廊東同克蘭芝兩個地鐵站之間，但多個地鐵站各有大批受阻乘客，接駁巴士相對就杯水車薪。

經過搶修後南北綫大約喺朝早0850時恢復正常， 免費接駁巴士服務就喺大約0910時停止――但唔少新加坡人今朝返工都已經遲晒大到。