社會運動靜咗刻 博懵減班就唔得

2019年12月18號朝早，行將退任嘅南區區議會華富北選區議員柴文瀚喺Facebook發文，指近日朝早新巴自行減去三班42號路線巴士班次。

[新巴42近日早上自行減去三班]就近日有投訴指﹐即使沒有任何交通阻礙﹐新巴42號在早上0630後自行減班﹐現以今早為例﹐發現0730 前原定至少七班減到四班。今早將與運輸署繼續聯絡了解情況﹐也證明交通問題﹐絕非如建制派所言只因社會運動而起。

Posted by 柴文瀚 Chai Man Hon on Tuesday, 17 December 2019

據柴議員所講，近日有投訴指，就算近日沿途無任何交通阻礙，新巴42號路線由0630時之後就自行減班。

佢仲附上巴士公司智能電話流動應用程式入面有關巴士到站時間預報版面嘅截圖，以2019年12月18號朝早為例﹐發現0630時至0730時，原定前後會有7班，但被減到4班。（編按：根據既定班次表，新巴42號路線由0630到0730呢一個鐘頭時間係每10分鐘一班，即係0630、0640、0650、0700、0710、0720、0730合共7班）

柴議員話會同運輸署繼續聯絡，了解情況…不過佢都指出，證明交通問題，絕非如建制派所講咁，純粹因為社會運動而引起。

其實各間巴士公司都面對唔同嘅問題，引致唔可以跟足班次表派出巴士服務公眾…而…

如果巴士公司可以開誠佈公，雖然未必能夠令到所有乘客都認同或者叫做吞咗啖氣，但起碼都叫畀機會公眾了解各間巴士公司喺背後面對嘅困難。

只不過當巴士公司繼續選擇推搪掩飾，乘客多年嚟已經見慣見熟呢啲手法，最終只會令到公眾認為巴士公司喺背後呃呃騙騙緊啲乜嘢。

21世紀至今已經就快過咗五份之一，開放更多資料畀公眾自己去理解發生緊乜嘢情況，其實都算係一種國際間有共識嘅企業社會責任。