多區悼念周同學 旺角堵路好大鑊

11月4號凌晨喺將軍澳尚德停車場三樓墜落二樓重傷科大學生周梓樂,經醫生搶救多日後,去到11月8號0808時證實不治死亡。香港有幾批市民喺多區上街舉行悼念集會,期間有市民自發堵塞部份馬路,其中喺旺角港鐵站一帶,多條街道無法行車,大批公共巴士被困。

主戰場一定係彌敦道,其中喺旺角道交界,市民用「水馬」封路,公共巴士全部停低,車長都落地集合,方便聽取現場車務督察進一步嘅指示。

當一旦穿過唔到彌敦道,原本喺新填地街、旺角道一帶行嘅公共巴士好快就積聚…

加上亞皆老街都有市民自發堵路,令到行上海街都唔得,咁又儲多一堆公共巴士喺度。

既然亞皆老街都被堵塞,新填地街咪又係行唔到…又加多一堆公共巴士參與「停駛」。

至於以為行塘尾道就甩到身?少年(定係中年?)你太天真喇!

旺角呢幾條街道被堵塞嘅情況維持咗幾個鐘頭,相關部門喺夜晚十點半開始陸續嘗試清理路障,喺馬路被堵塞期間,九巴、城巴、新巴都有大批路線受到影響。

呢幾個月以嚟嘅社會抗爭,令到香港市民內心不斷積聚怒氣,相信呢一種堵塞馬路嘅抗議行動將唔會喺短期內完全消失。當港鐵已經失去唔少香港市民嘅信任,令好多香港市民轉投路面公共交通服務,相信呢種堵路嘅抗議行動會影響唔少香港市民嘅出入。希望嘅係相關部門處理呢類市民抗爭行動嘅時候,唔好再濫用暴力,而其他受影響嘅市民亦要準備好隨時有其他出入路線同方案,更加重要嘅係萬一有員工需要返工而備受影響,僱主應該體諒到現時社會情況,唔好濫加壓力畀基層員工。

Be the first to comment

Leave a Reply

Your email address will not be published.


*