公司暗指涉政治 巴職聯取消派罩

巴士業職工會聯盟11月4號傍晚時分喺網上發表聲明,指會喺11月6號舉行「全城口罩日」,車長開工戴口罩加向乘客派口罩,以保障乘客呼吸系統健康。

然而事隔一日,巴士業職工會聯盟11月5號傍晚時分再次喺網上發出聲明,指要取消呢一個「全城口罩日」。

根據巴士業職工會聯盟嘅聲明,有巴士公司向旗下屬會接觸,表示依家屬於敏感時期,巴士員工唔可以喺巴士車廂入面向乘客派發口罩。如果巴士員工參與,公司將會「有所行動」――更表示「唔著公司制服,喺站頭派,就唔理你哋」。

巴士業職工會聯盟會對於佢哋為「保乘客呼吸健康」嘅派口罩行動被巴士公司同政治議題掛勾表示不解,更指出佢哋曾經同「健康空氣行動」做過巴士車廂空氣測試,發覺巴士車廂入面嘅空氣質素比室外環境更差

巴士業職工會聯盟指出今次行動原意只係為咗保障乘客健康著想,但受到巴士公司壓力之後,為保障返各巴士員工,無奈只有取消今次行動。

Be the first to comment

Leave a Reply

Your email address will not be published.


*