【澳門交通】 氹仔輕軌未通車 車站率先出吓煙

港鐵軌道營運(澳門)一人有限公司負責管理營運同維修嘅澳門輕軌系統即將投入服務,可能因為興建時間拖咗咁耐,等得唔耐煩,所以澳門輕軌系統「未出發先興奮」。

據澳門《力報》報道,澳門氹仔柯維納馬路輕軌站11月1號朝早懷疑因為電腦故障,導致後備油渣發電機自行著機,並且排出黑煙,幸好事件中唔使疏散亦無人唔舒服。

澳門消防局表示,11月1號朝早8點幾接獲市民報案,話見到輕軌站冒出黑煙,懷疑發生火警。

消防唔敢怠慢,並且立即調派人員趕往現場,到場了解後,得知事故起因沿自輕軌站地面發電機房,入面嘅後備油渣發電機曾經自己啟動,並且經由發電機房排氣口排出黑煙。

消防人員喺現場確認無人唔舒服亦唔使疏散,事件原因初步懷疑係電腦故障導致自己開著後備油渣發電機,排出黑煙而引致附近居民誤會。

澳門消防局表示,事件現時已通知澳門輕軌公司作出跟進。

2019年10月17號澳門消防局連同澳門輕軌股份有限公司喺東亞運輕軌站進行聯合演習。(澳門消防局資料圖片)

Be the first to comment

Leave a Reply

Your email address will not be published.


*