搭巴士時嘈兩句 落巴士時掹槍對

綜合警方及傳媒資訊，2019年11月24號夜晚10點幾，一個49歲姓吳男人搭巴士嗰陣同巴士上一個30歲姓歐男人嘈交，之後兩條友喺香港仔漁光道68號對開嘅石排灣邨巴士站一齊落車，姓歐嗰個突然喺身上掹咗一支疑似氣槍物體指嚇姓吳嗰個，期間並且扣動板機，對方受驚閃避。

事件驚動途人出手，合力將姓歐嗰個制服，並報警處理。

警員接報到場後，喺姓歐嗰個身上摷到一支懷疑氣槍同埋一樽懷疑「BB彈」，已經當證物拎走作進一步檢驗。

被氣槍射擊嘅姓吳嗰個無表面傷痕，毋須送院治理。

經初步調查，姓歐嗰個現正因涉嫌「普通襲擊」同埋「藏有仿製槍械」被警方拘捕，案件交由西區警區刑事調查隊第2隊跟進。