【英國巴士】廠務問題失準時 巴士公司被罰錢

威爾斯第二大城市史雲斯有居民以《質詢法案2005》向當地法院提出「公眾質詢」,指稱威爾斯第一巴士多條路線班次失準,無跟編定時間表出車。威爾斯副運輸專員亦指威爾斯第一巴士未能履行已向當局遞交嘅時間表提供公共巴士服務,結果史雲斯裁判法院向威爾斯第一巴士判處罰款20,600英鎊。

根據當局公開嘅資料,威爾斯運輸專員喺較早前已經因為威爾斯第一巴士提供嘅服務並唔準時,向該公司曾經發出「正式警告」。其中一次「正式警告」喺2019年2月發出,原因係喺2018年11月同埋12月,27、28呢兩條公共巴士路線嘅整體準時率只得67%同埋78%;其後因為16、L1、L2、L3、L4呢一批公共巴士路線整體準時率只有85%,而喺2019年4月發出另一次「正式警告」。

(Image: Richard Williams)

一個名為「威爾斯巴士用家」嘅非牟利組織,向來致力確保當地居民能夠得到最佳嘅公共交通接駁。佢哋因為接獲好多乘客投訴,加上有人向當地網媒投稿指威爾斯第一巴士經常「收車」,所以主動監察4、11、12、13呢四條公共巴士路線。

根據佢哋喺2019年4月2號到5月7號期間, 91次監察4號線公共巴士嘅數據顯示,準時率只有91.67%。而佢哋喺2019年4月1號到8號期間,監察11、12、13號線公共巴士,發現準時率低到69.94%。

得到呢啲數據之後,佢哋基於公眾利益當地裁判法院提出「公眾質詢」,威爾斯第一巴士嘅回應係指拉溫希爾巴士廠工程部有一啲問題,未能解決部份巴士「與安全無關」嘅維修,致使壞車率偏高――裁判官聽完威爾斯第一巴士答辯之後,認同巴士公司「未能履行滿足乘客需要」,因而判處罰款。

裁判官喺判詞中指出巴士公司「需要達成明文寫低嘅目標,就係為公眾提供準時、可靠、舒適嘅巴士服務」,而「大量投訴正正顯示跟唔到時間表提供服務已經令公眾沮喪」,同時間「公眾信任公共交通對減少使用私家車以避免塞車、保護環境至關重要」。

(Image: Robert Melen)

威爾斯第一巴士亦就「低服務水平」致歉,並承諾改善可靠度同準時率,發言人表示「公司過去曾有非常尤久嘅良好服務紀錄,今次係第一次遇上『公眾質詢』…如今搵到問題,公司會對準核心,致力改善拉溫希爾巴士廠工程部」。

相對香港各間巴士公司,其實佢哋嘅實質準時率有幾高?香港運輸署作為監管機構又做過幾多實質工作?哈哈哈哈哈~

Be the first to comment

Leave a Reply

Your email address will not be published.


*