如果有留意時事議題嘅話，都深明「土地問題」係香港經常要面對嘅困難，社會上不停有聲音要去覓地發展――半個地球之外嘅美國雖然話就話幅員遼闊，但喺主要嘅大都市入面，人口活動依然會集中喺某一啲特定區域嚟減少通勤嘅時間，所以一樣有同香港類似嘅「土地問題」。
好喇…入正題…現時隸屬三藩市交通局嘅三藩市城市鐵路局，除咗負責三藩市嘅輕鐵（有軌電車）與及纜車之外，仲營運緊16條無軌電車（trolleybus）路線同埋55條其他巴士路線。
三藩市城市鐵路局嘅波特雷羅車廠位處拜仁街同馬里波薩街之間，屬下嘅車輛每日服務緊102,000名乘客――然而原有波特雷羅車廠係早喺1915年建成，當年只係預計處理100架舊式有軌電車，不過依家係肩負緊138架掛接無軌電車嘅停泊同維修工作。
雖然場地已經明顯掹掹緊，但隨著城市不斷發展，預計未來5年車隊將會再增長大約六分一，以滿足乘客需求――真係搵位擺車都難。 （-_-）
除咗車輛數目嘅問題，現時車廠嘅樓高亦唔適合升起車輛作詳細維修，拖慢咗車輛維修進度，直接影響派車率。而佢哋仲打算響2035年之前將現有嘅柴油巴士全部轉成電池推動，相關嘅基建設施會令原有嘅波特雷羅車廠更加頂唔順不斷向前嘅時代巨輪。
另一方面，三藩市置身於美國加州地區，仲要面對一個嚴峻嘅自然災害問題――地震――即使撇除年紀老邁需要不斷維修，已經超過一百歲嘅波特雷羅車廠建築物明顯唔能夠追上現代防震要求。為咗員工安全，興建新嘅車廠亦係逼在眉睫。
而喺當局想興建新車廠嘅同一時間，佢哋除咗考慮到持續為呢個城市嘅公共交通服務帶嚟穩定、安全嘅維修工作場所之外，作為一個好鍾意「嘥時間去諮詢呢個嗰個」嘅民主自由社會，佢哋向當地居民舉行咗幾次諮詢，研究喺新嘅波特雷羅車廠上蓋興建住宅。
呢個車廠上蓋住宅項目雖然唔會好似香港咁插一支支高樓大廈，但係嗰幾層高嘅住宅都會提供到525個住宅單位。當局初步打算其中三分一以至一半以「三藩市居民絕對有能力負擔」嘅價錢出售。
同一時間，呢個發展項目會加入向街嘅路邊商舖，令到整個項目唔單止提供住宅並且方便到週邊地區居民生活。呢啲商住發展項目正好可以補貼呢一個估計高達4億美元嘅車廠重建計劃。
面對「土地問題」嘅香港，唔知將來會唔會有機會發展巴士廠上蓋物業――如果有嘅話，或者將來香港巴士迷出到街就會同人哋講「我住喺荔廠樓上」、「我住喺海廠樓上」、「我住喺柴廠樓上」 (^_^)y
係咪諗起都興奮呢？
Be the first to comment