【美國巴士】馬路突然開個窿 等燈巴士頭凌空

當地時間10月28號朝早8點前少少,美國賓夕法尼亞州匹茲堡市中心有一架當地港務局旗下嘅公共巴士喺燈位等緊轉燈嘅時候,馬路突然發生地陷!

隨著地陷造成一個大窿,呢一架等緊轉燈嘅巴士後半部分跌入大窿入面,巴士前半部就升起凌空,至於喺巴士後面一齊等緊轉燈嘅另一架起亞私家車就車頭晾喺大窿嘅邊,場面睇落非常驚險。

事發時呢一架巴士上面只有巴士車長同一名乘客,今次意外中巴士車長無受傷,至於巴士乘客就受輕傷,送到醫院接受治療後幸好無需留醫。

地陷原因暫時不明,當地公共安全部門總監回應傳媒查詢時指,地陷造成嘅大窿大約有15~20呎深,好彩當時呢個大窿並未足以將成架巴士扯入去。

事後當局需要協調截斷供電,然後安排吊臂車將巴士吊起移走,至於路面嘅修復工作,當局指因為要同時重新接駁地底嘅電纜同光纖,估計需要封閉相關路段幾個星期處理。

1 Trackback / Pingback

  1. 【冬甩個巴巴】巴士跌咗落個窿 商品噱頭熱論中 - 巴士台 HK Bus Channel

Leave a Reply

Your email address will not be published.


*